القاهرة ـ محمد الشناوي
قال الفنان علي الحجار إنه بدأ مشوار الغناء منذ 45 سنة، مؤكداً أنه لن يتوقف أبداً عن الغناء، ومضيفاً: "مش هبطّل غنا لحد ما أموت". وعن علاقته بموسيقار الأجيال محمد عبد الوهاب، قال الحجار: "ده موسيقار الأجيال كلها، وكان عبد الوهاب مغنواتي بجد وحفلاته كانت قليلة ولما يرتجل موال لازم يكون ملحنه الأول وكان حريص جداً، واتعلمنا منه التنقلات في النغمات بحرفية الصنايعي".
وكشف الحجار عن خطأ ارتكبه مع محمد عبد الوهاب، إذ قال: "كنت عند حلمي بكر وكان بيعمل أغنية وعبد الوهاب كلّمه في التليفون فقال له أنا مع علي الحجار هخلص وأجيلك، ووقتها طلب عبد الوهاب يكلّمني، وقالي إزيك يا أستاذ علي وعلى فكرة أنا من أشد المعجبين بصوت حضرتك، وقالي أنا سمعت "جفنه علّم الغزل" وشوفتك وأنت بتغنّي "صلينا الفجر فين"، وسألني ليه مش بتجيلي كل زمايلك بيكلّموني ويجولي، فأنا قلت أنا الصغير وأنت الكبير ومقدرش أقتحم عليك حياتك، قالي طيب تعالى يوم السبت، وللأسف وقتها قلت أنا عندي تسجيلات الأسبوعين الجايين وخايف أقول جاي ومجيش، وللأسف دي من الحاجات اللي أعتبر إني غلطت فيها".
وأوضح الفنان علي الحجار أنه حقق في السنة الماضية 2021 حلما فنيا عمره 30 سنة، هو القيام بجولة غنائية في محافظات الصعيد برفقة فرقته. قائلا : "ده كان حلم قديم بقاله 30 سنة أو أكتر، إن أنا عايز آخد فرقتي وألف الصعيد، ومش هقدر أعمل ده لوحدي، في إجراءات إدارية وأمنية وكان لازم أجهزة الدولة تخدم الفكرة."
وكشف علي الحجار كواليس تحقيق هذه الفكرة، موضحا أنه التقى بمدير إدارة نوادي ضباط القوات المسلحة في جميع أنحاء الجمهورية، وذلك بعد الحفل الغنائي الذي أحياه على مسرح الزمالك بتاريخ 6 أكتوبر، ضمن سلسلة حفلات شهرية يقدمها في المسرح منذ مارس الماضي، وهو الحفل الذي قدم في ختامه "ميدلي" الأغنيات الوطنية. وأضاف:"المنظر كان حلو جدا، والشباب الصغير اللي سمع عن انتصارات أكتوبر في الكتب مسك الأعلام وكان بيغني. لقيته بعد الحفلة بيقوللي إيه رأيك نعمل كذا، طبعا كنت هعيط لإنها أمنية وحلم عندي نفسي أحققه."
وأشار علي الحجار إلى أن الحظ حالفه بتقديم حفله الغنائي الأول في الأقصر قبل يومين من افتتاح طريق الكباش، وتابع: "الكليبات والأغاني في التليفزيون بتظلمني. أنا في الحفلات بيبان عندي طاقة أكبر لما أشوف بشر قدامي. الحمد لله الحلم إتحقق بشكل جميل، وطبعا أنا غنيت تقريبا كل المسلسلات الصعيدي."
وعلق الحجار على تقديم المطرب تامر حسني أغنية "عارفة" في إحدى البرامج، وأبدى الحجار إعجابه الشديد بأداء تامر حسني لأغنيته، قائلاً: "شكرته لأنه غنّاها حلو وهو بدأ حلو، وبيطور نفسه، بيتغير وبيتقل، خاصة إنه مغني وملحن، وناجح في الأفلام وعنده خفة دم". وكشف الحجار عن اتفاق قديم عُقد بينه وبين تامر حسني لكنه لم يتحقق، قائلاً: "اتفقنا يعمل لي لحن أغنية، لكن محصلش، وبقالنا كثير متقابلناش".
قد يهمك ايضاً