أمينة خليل تتحدث عن زوجها أحمد زعتر ودعم عائلتها وتكشف شغفها بالفن منذ الصغر

حلّت الفنانة أمينة خليل ضيفةً على برنامج "The W" الذي تقدّمه الإعلامية دينا غبور على "يوتيوب"، حيث تحدثت عن زوجها المصوّر أحمد زعتر، وعبّرت عن امتنانها الكبير لدعم عائلتها لها على مدار السنوات الماضية، وكشفت أنه لم يكن هناك أي نوع من الإلحاح بخصوص زواجها، بجانب حديثها عن شغفها الكبير للفن منذ الصغر.

وقالت أمينة: "أهلي مكنوش بيزنّوا عليَّ علشان أتجوّز، وفعلاً أنا محظوظة إن أهلي مختلفين، وده اللي ساعدني أبقى البني آدمة اللي أنا عليها دلوقتي".

وعن مفهوم الحب بالنسبة إليها، قالت: "مفهوم الحب اتغيّر عندي وبقى أعمق، وكنت فاكرة إني عايزة حد شبهي وشبه تفكيري، وبعدين اكتشفت أن شريك حياتك ممكن يبقى عكسك، أنا شخصية عفوية ولكن مش همجية، وقابلت الشخص اللي حاسة إنه شبهي والعلاقة ممشيتش خالص، فقلت إني عايزة حد أساسياته شبهي بس شخصيته مختلفة، وأحمد جوزي راكز وقليل الكلام وتقيل، وأنا وصلت لمعادلة لما أدخل في قصة حب مدّيش قلبي كله".

وتابعت: "أنا بحب الحب، ومش لازم يكون حب لراجل، ممكن يكون لعيالك وأهلك وشغلك، وعمري ما حسيت بجنون العظمة، وأنا ضد مبدأ إن الفنان يتحطّ في قالب معين ويتعامل بطريقة معينة، وبتعمّد إني أقول رأيي، والناس بتستسهل إنها تحكم على بعض، وده شيء بيعصبني جداً، ليه بنحكم على بعض؟".

أما عن حبّها للفن، فعلّقت أمينة خليل قائلةً: "أنا مدخلتش الشغلانة دي علشان عايزة شهرة، أنا حقيقي دخلتها عشان بحبّها، أنا بني آدمة حالمة وطموحة جداً وعاشقة للفن من وأنا صغيرة، وأنا محظوظة من وأنا صغيرة لأن عائلتي دعموني".

كما روت موقفاً شعرت أنها تعرّضت فيه للظلم، قائلةً: "من 3 سنين جالي ديسك في ضهري وكنت بعمل أشعة وكنت ماشية متألمة جداً، واحدة قابلتني وحاولت إني ابتسم مع أن والدي ووالدتي مسنداني، وبعد أسبوع لاقيت صورتي نازلة ومكتوب إني تنكة وبتشتم، أنا عيطت وحسّيت إني صعبت عليَّ نفسي واتظلمت، وبعدها الناس دافعت عني ونزّلوا صورهم معايا اليوم ده".

وأوضحت أمينة خليل أنها لا تشعر أنها تحمل رسالة، قائلةً: "مش حاسة إني حالياً أقدر أقول إن عندي رسالة، أنا مين علشان أقول رسالة، ويمكن لو عندي حاجة أقولها هقول إن الناس تسمع صوتها هي".

قد يهمك أيضــــــــــــــا

قبل تكريمها في مهرجان كان 2025 أمينة خليل تبرز كصوت المرأة في الدراما المصرية

دينا الشربيني وأمينة خليل ترقصان معاً في أجواء شبابية