يسرا اللوزي تٌصرح كان نفسي والدي الراحل يتفرج على صلة رحم

كشفت الفنانة يسرا اللوزي، عن افتقادها الشديد لوجود والدها الأستاذ الدكتور محمود اللوزي الذي فارق الحياة منذ ثلاثة أعوام، وقالت إنها كانت تتمنى أن يشاهد مسلسلها الأخير "صلة رحم"، كما تحدثت يسرا عن كواليس استدراجها لمقلب رامز جاب من الآخر، مؤكدة أنها ليست على عداء مع زميلتها في الحلقة نسرين أمين كما يروج البعض.
يسرا اللوزي: لا توجد خلافات مع نسرين أمين

أضافت يسرا اللوزي خلال حوارها مع الإعلامية إنجي علي، في برنامجها نجوم رمضان أقربلك: مفيش مشاكل بيني وبين نسرين أمين، وسألوا قبل الحلقة هي يسرا ليها مشاكل مع مين، اتقالهم معندهاش مشاكل مع حد، مكنوش عارفين فجابوا شخصيتين عكس بعض في الحلقة، لأن فعلا أنا معنديش مشاكل مع حد.

يسرا اللوزي: نشأت في عائلة ملتزمة

وأضافت يسرا اللوزي، متحدثةً عن أفراد أسرتها: أنا شبه والدي أكتر وأخدت منه حب الفن والالتزام، إحنا عائلة ملتزمة في كل حاجة، مواعدنا مظبوطة وواضحة، واتعلمت إن مفيش حد أحسن من حد، كلنا زي بعض وكل البشر زي بعض، وكلمة ابن ناس بتُستخدم غلط.

وتحدثت يسرا اللوزي عن والدها الراحل، المخرج محمود اللوزي، حيث قالت: كان نفسي والدي يكون موجود يتفرج عليا السيزون ده، حتي والدتي لاحظت إني بحاول أجتهد أكتر عشان أقرب منه، كنت بعمل ورشة تمثيل مع مخرجة إنجليزية جت مصر عدة مرات طريقتها في التدريس شبه والدي أوي، في مرة وأنا في الورشة وهي بتتكلم أنا عيطت لأن هو نفس كلامه، نفس الفلسفة في التدريب والتعامل في التمثيل.
يسرا اللوزي تكشف كواليس مسلسل دهشة

وكشفت يسرا اللوزي كواليس مسلسل دهشة، قائلة: لما خلصوا الديكور في مسلسل دهشة وهدّوه، وبعدين بنوا القرية بتاعة دهشة، قعدنا فيها 5 شهور بنصور، وبعد ما هدوا الديكور اللي صورت فيه، ده كان يوم ما اكتشفت إني حامل.

وأضافت يسرا اللوزي: الدور كان صعب والتصوير في أبو رواش فـكنا بنتحرك بـ توك توك وفي حتت مكسرة وأنا حامل، كلمت أستاذ صادق الصباح (المنتج) قولتله أنا مش عارفة أقولك إيه أنا صورت مشهد في الديكور بتاع حنان مطاوع بس أنا لسة مكتشفة إن أنا حامل وتقريبا أنت أول حد أقوله، وهعتذر عن المسلسل، قالي مفيش أي مشكلة وألف مبروك، وكان رافض إني أعتذر ووفرلي سبل الراحة في التصوير، وكان من أحلي الأدوار اللي عملتها لحد دلوقتي.

يسرا اللوزي: إنجاب البنات يجلب الأمان

وتطرقت يسرا اللوزي للحديث عن ابنتيها، مشيرة إلى أن خلفة البنات تجلب الأمان، حيث قالت: أنا شايفة اللي خلف ولد هو اللي هيشيل الهم، اللي خلف بنت بيحس بالأمان وإن عنده صاحبة بقية عمره، أنا لو كان عندي ولد كنت هحبه بس أنا كان نفسي أجيب 3 بنات.

قد يٌهمك ايضـــــاً :

قصة إياد نصار ويسرا اللوزي مع الإنجاب وتأجير الرحم في "صلة رحم"

يسرا اللوزي تكشفت السبب وراء قبولها المشاركة في مسلسل المداح